വീട്

tuesday,november 3, 2009

വഴിവക്കിലെ നിന്റെ വീട്

നോക്കി നിന്നുപോയിട്ടുണ്ട് 

പലപ്പോഴും...

കുട്ടികൾ കുത്തിമറിയുന്നതിന്റെയും 

അടുക്കളപ്പണിയുടെയും ബഹളം,

വിരുന്നുകാരുടെ കൂട്ടച്ചിരി,

ബിരിയാണി മണം...

രാത്രി നിറയെ ലൈറ്റിട്ട വീട്.

ഇന്നലെ ആ വഴിക്കു വരുമ്പോൾ

വീട് മൂകമായിരുന്നു.

ഇരുട്ടിലായിരുന്നു 

ജനലും വാതിലും അടഞ്ഞിരുന്നു 

ഉമ്മറത്തെ വെട്ടിയൊതുക്കിയ ബോഗൻവില്ല ,

ടെറസ്സിലേക്കു കാടായി വളർന്നിരുന്നു,

ഉപ്പാനോ  മൂങ്ങയോ വാവലോ തേളോ 

കയ്യേറിയിരുന്നു നിന്റെ വീടിനെ...

ആരോ പറഞ്ഞു കേട്ടു,

സാധനങ്ങൾ പെറുക്കാൻ വന്ന 

ഒരു ആക്രിക്കാരൻ 

എല്ലാം കൊണ്ടുപോയെന്ന്,

ചിരിയും ബഹളവും തമാശയുമെല്ലാം.

( Posted by sarmila at 12:44 am, 5 comments)